هالة صدقي: أول قصة حب في حياتي كانت مع شاب بالنادي
حكت الفنانة هالة صدقي عن أول قصة حب في حياتها ولماذا لم تنته نهاية سعيدة وتكلل بالزواج، وقالت هالة صدقي وخلال لقائها مع الإعلامي عمرو أديب في برنامج بيج تايم بودكاست" المذاع عبر قناة MBC: "أول قصة حب كان شاب معايا في النادي، كانت قصة حلوة وأنا كنت صغيرة وجيه اتقدملي لكن طبعا منفعش لاختلاف الديانة".
وتابعت: "حبيته لكن كان صعب المجتمع بتاعنا أنا وهو مكنش ينفع، كان بيجي يعدي تحت العمارة ويقف وأنا قاعدة في البلكونة بذاكر عشان يشوفني، هو كان رياضي وأنا رياضية وكان الفرق بتقعد مع بعض في النادي واتعرفنا".
كما تذكرت هالة صدقي حكاية أخرى عن حبيب مجهول قائلة: "كنت وقت الامتحانات أصحى أقعد أذاكر الصبح بدري في البلكونة، وكان في عمارات جنبي ألاقي نور البلكونة مفتوح ناس تانية بتذاكر، وكان في راجل كبير في الدور الرابع قاعد هو كمان، كان بيجيلي جوابات غرامية بيحطها في البوسطة وأنا مش عارفة من مين، كلها ليه بتصحي بدري أوي كده الدنيا برد عليكي، بعدها اكتشفت أنه ده جد صاحبتي اللي بيبقى قاعد في البلكونة، وبعدها مات جاله نزلة برد لأنه كان بيقعد الصبح بدري في البلكونة".
يذكر أن هالة صدقي غابت هذا العام عن دراما رمضان، وكان آخر أعمالها مسلسل جعفر العمدة" وعرض في رمضان 2023 من بطولة محمد رمضان وزينة ومي كساب وإيمان العاصي وأحمد فهمي وطارق النهري، تأليف محمد سامي ومهاب طارق وإخراج محمد سامي.
إغلاق
