أبرز تصريحات الفنانة فادية عبد الغنى
تحدثت الفنانة فادية عبد الغنى، خلال مداخلة هاتفية، لأحد البرامج التليفزيونية، عن أعمالها الفنية وسبب رفض فيلم معالى الوزير، وحديثها مع الشيخ الشعرواى.
وقالت فادية: "لست مقلة في أعمالى الفنية ولكن أفكر ألف مرة قبل اختيار أعمالى، بتتعرض عليا أعمال كثيرة لكنى انتقى أدوارى بعناية وبحب الدراما أكثر".
وأضافت فادية عبد الغنى: "روحت للشيخ الشعراوي البيت وقولتله نعمل إيه في مرض والدتي، قالي في حالات المرض نقرب من ربنا جدا، وأهداني مصحف أحطه تحت رأس والدتي وزجاجة مياه مقروء عليها القرآن الكريم كله وقالي تشرب منها، ويا إما اللقاء أو الشفاء، وده حصل سبحان الله في نفس اليوم اللي زورته، ونزلت رحمة ربنا عليها الله يرحمها".
وتابعت فادية: "في زيارتى للشيخ محمد متولي الشعراوي كنت لابسة إيشارب لأني مش محجبة وكنت محرجة، وقالي إنتي حاطة إيشارب ليه وإنتي أصلاً مش محجبة؟ قولتله احترامًا ليك.. قالي تحترميني أنا وعملالي حساب ومش عاملة حساب لربنا، قالي أنا عارف إنك مش محجبة خليكي على طبيعتك، والحقيقة الشعراوي كان لطيفا".
وسألت فادية عبد الغنى الشيخ الشعراوى عن هل التمثيل حرام؟ رد قائلا "الفن عامل زي السكينة ليها كذا استعمال ممكن أذبح بها بني آدم، أو أقطع بيها لحمة للغلابة تأكلها أو نستعملها في حاجة مفيدة، وإنتي من الناس اللي مش بتعملي حاجة فاجة في الفن".
واستكملت فادية حديثها: "لما اتعرض عليا فيلم معالي الوزير كان فيه مشهد مكنش ينفع إني أعمله بيتلبس فيه زي مايوه وأنا مقدرش أعمل ده وصعب عليا أعمل ده ومكنش ينفع المشهد يتشال لإنه في صميم دراما الفيلم فاعتذرت والأمور مشيت عادي"
